കൊല്‍ക്കത്ത: സന്തോഷ് ട്രോഫി ഫുട്‌ബോളില്‍ ബംഗാള്‍ ചാമ്പ്യന്മാരായി. പഞ്ചാബിനെ ഒന്നിനെതിരെ രണ്ടു ഗോളുകള്‍ക്ക് പരാജപ്പെടുത്തിയാണ് 11 വര്‍ഷത്തിന് ശേഷം ബംഗാള്‍ വീണ്ടും ചാമ്പ്യന്മാരാകുന്നത്. 65 സന്തോഷ് ട്രോഫികളില്‍ ഇത് മുപ്പതാം തവണയാണ് ബംഗാള്‍ ചാമ്പ്യന്മാരാകുന്നത്. മലയാളി താരം ഡെന്‍സണ്‍ ദേവദാസാണ് ബംഗാളിന്റെ രണ്ട് ഗോളുകളും നേടിയത്.
മുപ്പതാം മിനിട്ടില്‍ ബല്‍വന്ത് സിങിലൂടെ പഞ്ചാബാണ് ആദ്യ ഗോള്‍ നേടിയത്. ആദ്യപകുതിയുടെ ഇഞ്ചുറി ടൈമില്‍ തന്നെ ബംഗാളിന് വേണ്ടി ഡെന്‍സണ്‍ ദേവദാസ് സമനില ഗോള്‍ നേടി. പിന്നീട് 78 ആം മിനിട്ടില്‍ ഡെന്‍സനിലൂടെ തന്നെ ബംഗാള്‍ വിജയഗോളും നേടി. 1996 തുടങ്ങി നാലുതവണ തുടര്‍ച്ചയായി ചാമ്പ്യന്മാരായ ബംഗാളിന് 1999 നുശേഷം ഇതേവരെ ദേശീയ ഫുട്‌ബോള്‍ ചാമ്പ്യന്മാരാകാന്‍ സാധിച്ചിരുന്നില്ല.
ഗോവയ്‌ക്കെതിരായ സെമി ഫൈനലിലും ഡെന്‍സനാണ് ബംഗാളിനെ രക്ഷിച്ചത്. കൊല്‍ക്കത്ത ലീഗില്‍ കഴിഞ്ഞ സീസണിലെ ഏറ്റവും മികച്ച കളിക്കാരനുമായിരുന്നു ചിരാഗ് യുണൈറ്റഡിന്റെ ക്യാപ്റ്റന്‍ കൂടിയായ കണ്ണൂര്‍ ബര്‍ണശ്ശേരിക്കാരന്‍.
ഓരോകളിക്കാരനും രണ്ടുലക്ഷം രൂപ വീതം, മലേഷ്യയില്‍ വിജയാഘോഷം തുടങ്ങിയവയാണ് വിജയികളായ ബംഗാളി ടീമിനെ കാത്തിരിക്കുന്നത്.
No comments:
Post a Comment